قصة رائعه وجميله وفيها حكمه خياليه قصه المثل وافق شن طبقه

عدد المساهمات : 36 تاريخ التسجيل : 04/10/2009

السلام عليكم ورحمة الله وبركاته
كلكم سمعتو المثل وافق شنٌ طبقه
بس قليل الي يعرف سالفتهم. انا بقولكم السالفه.
هذا شنٌ رجل حكيم في زمانه وكلامه رموز من زود العلم والحكمه الي فيه , وعشان كذا ما يبي يتزوج غير وحده مثله (يعني يبي التوافق الفكري بينهم). المهم دوّر دوّر الرجال ماحصل في ديرتهم الي تناسبه فعزم على السفر للبحث عن شريكت الحياه.
وهو في الطريق قابله رجال كبيربالسن مسافر الى نفس الوجهه. فتفقو انهم يمشون مع بعض خوفاً من قطاعين الطرق.
المهم بعد فتره قال الفلفوووسي شن قال:ياشايب تشيلني ولا اشيلك
قال الشايب: لا تشيلني ولا اشيلك كل واحد يركب ناقته
واترك عنك الخبال الزايد انا كبر ابوك عيب تمزح معاي <<< ههههههههههههههههههههههههه العن ابو كسحات الشياب والله ماعندهم لعب
سكت شن

وبعدها بفتره مرّو على مزرعه قطوفها يانعه قال مستر شن لشايب: ياشايب تعتقد صاحب المزرعه حصدها.
قال الشايب: اعتقد انك مجنون ولاانت صاحي وكيف حصدها يالخبل وانت تشوف ثمرها فيها.
لحووووووووووووووول لله هذا المجنون الي خاواااني
وسكت شن

مرّو علي قريه وفيها ناس شايلين جنازه تفلسف الفلفوووسي شن وسأل سؤال لولبي وقال: يالشايب تعتقد هذا الرجال ميت ولا حّي.
قال الشايب الله يفكني منك ياذا الخبل وكيف حّي وهو على النّعش ميت من صيد امس هذا هو قدامك ملعون والديه وتقول حي.
سكت شن
المهم وصلو للقريه الي هم يبونها قال الشايب تفضل معي ياشن فالبيت عندي ابي اضيفك عندي وتنام وبكرا تروح وين ماتروح .
قال شن مشكور يالشايب انا بروح الى اعلى وانظف مكان في قريتكم.
قال الشايب: والله ان اعلى مكان الخبال حقك يالخبل
وفترقو على كذا.
راح الشايب للبيت وجلس مع بنته الانسه طبقه وقالها قصة هذا المجنون الخبل شن الي قابّله في الطريق
قالت طبقه: يابوي هذا مو مجنون هذا حكيم.
لما قال شيلني وشيلك يقصد فيها سولف علي واسولف عليك لين يقصر الطريق علينا بسوالفي وسوالفك
ولما سألك عن المزرعه يقصد فيها صاحب المزرعه باع الثمر قبل الحصاد والا ماباعها
اما بخصوص الجنازه كان قصده اذا الميت عنده اولاد يشيلون اسمه ولا مات اسمه معه
اما اعلى وانظف مكان فهو يقصد المسجد
قال الشايب: الحين فهمت
وشال نفسه الشايب نفسه وراح على المسجد وشاف شن جالس وجلس جنبه قال الشايب: انا يولدي كنت اعرف وش تقصد بكلامك حسبي الله عليك شيطان انتا يوليدي تراني اعرف بس مابي اقول وحنا مسافرين وكان مزاجي ما كان رايقلك وانا كنت افكر في بيتي والحين يوم اني تطمنت عليهم جيت اعتذر منك.
قل شن: وغير هذا الكلام من قالك اني في المسجد
قال: انا.
وحول الشايب ينسب الذكاء لنفسه هههههههههههه
بس ما صدقه شن وا أصر عليه ان يقوله الحقيقه وعترف الشويب بعد الموت والعله والقرف والقلق ان بنته الي فسرت الكلام.
وما صدق خبر الفلفوسي شن انه حصل شريكة حياته الي تفهم فلسفته.
ومن بعدها قالو الناس وافق شنٌ طبقه.

وسلامتكم وخلصت القصه واتمنى انها تععجبكم

عدد المساهمات : 4 تاريخ التسجيل : 16/10/2009

هههههههههههههههههههههههه
قصه روعة
سلمت وسلمت اناملك
رائع ماخطته لنا أناملك
ألف شكر
واصل عطائك ومجهودك المميز
يعطيك العافية لاعدمناك ولاعدمنا هالانامل
دمت ودام عطائك

عدد المساهمات : 36 تاريخ التسجيل : 04/10/2009

تسلم يالون البحر
ويسلمووووو على الرد الجميل ياجميل

Admin عدد المساهمات : 25 تاريخ التسجيل : 02/09/2009

مشكور يالغا لي ع القصه

ننتظر منك كل جديد